नेपालगन्ज, असार २–
नेपाली कांग्रेसका सभापति एवम् पुर्वप्रधानमन्त्री शेरबहादुर देउवाले कांग्रेस पहिलो शक्ति नहुँदा मुलुकभित्र प्रजातन्त्र रहन नसक्ने खतरा औल्याएका छन् । मुलुकलाई निकास दिन कांग्रेस बलियो हुनुपर्ने बताए । नयाँ संविधान कार्यान्वयनमा ल्याउन नेपाली कांग्रेसको सिंगो ध्यान केन्द्रित रहेको उनको भनाई छ । नेपाली कांग्रेस बाँकेले बिहीबार आयोजना गरेको स्वागत कार्यक्रममा देउवाले भने, ‘एमाले अझै प्रजातान्त्रिक भएको छैन, माओबादी त झन् भएकै छैन, उनीहरुलाई बामपन्थीबाट प्रजातान्त्रिक बनाउन कांग्रेस बलियो हुन जरुरी छ ।’ एमाले र माओबादीलाई प्रजातान्त्रिक पार्टी बनाउन कांग्रेस बलियो हुन जरुरी रहेको बताए ।
मुलुकमा प्रजातन्त्र ल्याउन, हत्या हिंसामा लागेको माओबादीलाई शान्ति प्रक्रियामा ल्याउन, राजा ज्ञानेन्द्रलाई फालेर गणतन्त्र ल्याउन नेपाली कांग्रेसले नै नेतृत्व गरेको दाबी गर्दै सभापति देउवाले अब हुने स्थानीय तह, प्रान्तिय र केन्द्रिय चुनाव जित्न नेपाली कांग्रेसका कार्यकर्ता एकतावद्ध हुनुपर्ने बताए । ‘हिजोका कुरा बिर्सेर पार्टी बलियो भएपछि मात्र निर्वाचन जित्न सक्छौं, पार्टीले जितेपछि आपसमा झगडा गर्न पनि सकियो, पार्टीले हारिसकेपछि झगडा गर्नुको अर्थ हुदैन,’ उनले थपे ।
प्रधानमन्त्री केपी शर्मा ओलीले तीन वटै निर्वाचन आफै गराउने अभिव्यक्ति दिएपनि उनकै दलका नेता माधव नेपाल, झलनाथ खनाल, बामदेव गौतमले सरकारको विकल्प खोजिरहेको देउवाको भनाई छ । सो अवसरमा बोल्दै कांग्रेसका केन्द्रिय सदस्य गगन थापा, दीपक गिरी र किशोरसिंह राठौरले पनि सम्वोधन गरेका थिए । नेपाली कांग्रेस बाँकेका सभापति किरण कोइरालाले सभापति देउवा सहित केन्द्रिय सदस्यहरुलाई स्वागत गर्दै बाँकेको विकासका लागि पहल गरिदिन आग्रह गरिन् । देउवालाई कांग्रेस कार्यकर्ताले भव्य स्वागत गरेका छन् ।
