काठमाडौं, कात्तिक २०
भूकम्पले भत्किएका विद्यालय पुनर्निर्माणका लागि स्वदेशी संघसंस्था तयार भएपनि सरकारले डिजाइन उपलब्ध गराउन नसक्दा निर्माण कार्य सुरु हुन नसकेको समाचार आजको कान्तिपुर दैनिकमा छ ।
क्षति भएका ५ सय विद्यालयका २ हजार ५ सय कक्षाकोठा बनाउन करिब २ अर्ब लगानी गर्न ४८ संस्था तथा व्यक्तिले शिक्षा विभागसँग सम्झौता गरिसकेका छन् । भूकम्प गएको ६ महिना बितेको छ । अब निर्माण हुने विद्यालय भवन कस्तो बनाउने भन्ने डिजाइन विभागसँग छैन । जाइका र एडीबीले प्रभावित जिल्लामा भवन निर्माण गरिदिने भन्दै विभागले विद्यालय भवन पुनर्निर्माण गर्न बजेट शून्य राखेको छ । एडीबीसँग सम्झौता भए पनि जाइकासँग अझै सम्झौता भएको छैन । विभागकै लापरबाहीले प्रभावित जिल्लाका विद्यार्थी छाप्रोमा पढ्न बाध्य छन् । उद्योग वाणिज्य महासंघका उपाध्यक्ष किशोरकुमार प्रधानले भूकम्प प्रभावित १४ जिल्लामा १ सय ४० विद्यालय बनाउन विभागसँग सम्झौता भएको तीन महिनाभन्दा बढी हुँदा पनि डिजाइन नपाउँदा काम सुरु गर्न नसकेको बताए । विभागसँगको सम्झौताअनुसार २२ करोड ४० लाख खर्च गर्ने योजना अघिसारेको छ । ‘हाम्रो इच्छाले विद्यालय बनाइदिन्छौं भनेर डिजाइन लिन ४० पटकभन्दा बढी गइसक्यौं,’ उनले भने, ‘जहिले गए पनि हुन्छ भनेर फर्काउने गरेको छ । अब त दिक्क लागिसक्यो ।’ यसले दातालाई थप निराश बनाएको महासंघको टिप्पणी छ ।
