नेपालगन्ज, कात्तिक २०–
सिमावर्ती छिमेकी बजार रुपैडिहामा रोकिएका सवारी साधनलाई सहज रुपमा नाका प्रवेशको अनुमति दिन नेपाली पक्षले गरेको आग्रहलाई भारतीय कष्टमले सिधै बेवास्ता गरेको छ । ‘माथिको आदेश’ भन्दै कष्टमले मंगलबार अपरान्हबाट नेपालतर्फ आउन लागेका सयौं मालबाहक र पेट्रोलियम ट्यांकरलाई प्रवेश अनुमति दिनमा रोक लगाएको थियो । कष्टमले कडाई गर्दा तीन दिनदेखि अधिकांस सवारी साधन रोकिएका हुन् । भारतीय कष्टमले बिहीबार पनि मालबाहक र पेट्रोलियम ट्यांकरलाई सहज रुपमा प्रवेश अनुमति नदिएको ईलाका प्रहरी कार्यालय जमुनाहाले जनाएको छ ।
कष्टमले एकाध मालबाहक सवारी साधनलाई मात्र प्रवेश अनुमति दिएको प्रहरीले जनाएको छ । ‘कष्टमले मन लागे छाड्ने र मन नलागे रोक्ने काम गरिरहेको छ,’ इप्रका जमुनाहाका इन्चार्ज प्रहरी नायव निरिक्षक (सई) विष्णु गिरीले भने । इप्रका जमुनाहाका अनुसार रुपैडिहामा बिहीबार बेलुका सम्म प्रवेश अनुमति नपाएर रोकिएका मालबाहक र पेट्रोलियम ट्यांकरको संख्या १ सय ५० नाघेको छ । त्यसमध्ये ५ वटा पेट्रोलियम ट्यांकर र २ वटा ग्यास बुलेट रहेको बताइएको छ । ‘भारतीय कष्टमले अनुमति दिनमा आनाकानी गरेपछि सयौं सवारी साधन रुपैडिहमा रोकिएका छन, हामीले पटक–पटक गरेको अनुरोधलाई कष्टमका कर्मचारीले बेवास्ता गरे,’ सई गिरीले सुनाए । कष्टमका कर्मचारीको भित्रि मन्साय बुझ्न गाह्रो भएको नेपाली अधिकारी बताउँछन् ।
सिमा नजिक कष्टमले अनुमति नदिइरहेका बेला भारतीय सुरक्षाकर्मीले केही पेट्रोलियम ट्यांकरलाई बाबागन्जमै रोकेर अगाडी बढ्न नदिएको आयल निगमका क्षेत्रीय प्रमुख श्रीचन्द्र श्रेष्ठले बताए । भारतको गोण्डा डिपोमा इन्धन भरेर फर्किएका कुल २१ वटा ट्यांकर मध्ये १४ वटा पेट्रोलियम ट्यांकरलाई भारतीय सुरक्षाकर्मीले असुरक्षाको कारण देखाउँदै बाबागन्जमा रोकेको जानकारी आफुलाई प्राप्त भएको उनले बताए । ‘सिमा प्रवेशमा यतातिर कष्टमले अवरोध गरिरहेको छ, उतातिर बाबागन्जमा पनि सुरक्षाकर्मीले ट्यांकरहरुलाई अगाडी बढ्न नदिएको जानकारी आएको छ,’ श्रेष्ठले भने । बाबागन्ज रुपैडिहाबाट करिव ७ किलोमिटर टाढा पर्छ । भारतीय कष्टमले सिमा प्रवेशको अनुमति नदिएपछि तीन दिनदेखि कुनैपनि पेट्रोलियम ट्यांकर भित्रिन नपाएको उनले बताए । ‘तीन दिनदेखि कुनैपनि पेट्रोलियम ट्यांकर भित्रिन पाएका छैनन, इन्धन नआउँदा वितरणमा चरम संकट परिरहेको छ,’ उनले थपे ।
भारतीय कष्टमसँग अनुमति माग्दा आफ्नो निकायबाट आदेश नआउँदा सम्म नछाडिने जवाफ दिएको क्षेत्रीय प्रमुख श्रेष्ठले बताए । कष्टमले सिमा प्रवेश अनुमति रोक्नु अघि सोमबार वीरगन्ज नाकामा भएको तनावलाई मध्यनजर गर्दै भारतीय सिमा सुरक्षा बल (एसएसबी)ले नेपालबाट सवारी साधन भारत प्रवेशमा रोक लगाएको थियो । नयाँ संविधान घोषणा भए लगत्तै असन्तुष्टी जनाउँदै भारतले अघोषित नाकाबन्दी गर्दा रुपैडिहा नाकामा पनि एसएसबीले सवारी साधन नेपाल प्रवेशमा अवरोध गर्दै आएको थियो । त्यसयता नेपाली अधिकारीहरुले आफ्नो समय दिनहुँ भारतीय काउण्टरपार्टलाई अनुरोध गर्नमै खर्चिनु परेको छ । आजको नागरिकमा खबर छ ।