रुपन्देही, असोज २०
मधेसी मोर्चाले भारतीय भूमिमा बसेर आन्दोलन चर्काउँदै केही नेपाली नागरिकलाई भारतीय भूमिमै कुटपिट गरेपछि मालवाहक गाडी बेवारिसे अवस्थामा छाडेर आफ्नो भूमिमा आएको नेपाली चालकले बताएका छन् । भारतीय पक्षको आडमा संयुक्त लोकतान्त्रिक मधेसी मोर्चाले नेपाल–भारत सीमा नाका वेलहिया ठप्प पारेपछि असुरक्षाको महसुस गर्दै नेपाली चालक आफ्ना गाडी बेवारिसे अवस्थामा छाडेर नेपाल आएका छन् । गत आइतबार दिउँसोदेखि भारतीय बजारबाट मालवाहक सवारी आउन नदिएको भारतीय भूमिमा रहेका २०० भन्दा बढी चालक असुरक्षाको महसुस गर्दै नेपाल आएका हुन् । उनीहरुले ज्यानभन्दा ठूलो गाडी र सामान नभएको भन्दै आफूहरु आफ्नै भूमिमा आएको बताएको इलाका प्रहरी कार्यालय वेलहियाले जनाएको छ । वेलहियाका प्रहरी निरीक्षक रविनबाबु रेग्मीका अनुसार नेपाल आएका चालकले वेलहियामा केही समय नाराबाजीसमेत गरेका थिए ।
