नेपालगन्ज– देशमा जारी लामो लकडाउनका कारण प्रभावित उद्योग, व्यवसाय सञ्चालनका लागि विभिन्न राहत प्याकेज ल्याउनुपर्ने माग गर्दै प्रजातान्त्रिक उद्योगी व्यवसायी संघ बाँकेले नेपालगन्जमा प्रदर्शन गरेको छ । प्रभावित उद्योगी, व्यवसायीका लागि आर्थिक प्याकेज तत्काल घोषणा गर्नुपर्ने, घर भाडाका लागि घरधनीहरुसँग छलफल गरी तत्काल सहजीकरण गर्नुपर्ने र बन्दाबन्दी अवधिभरको बैंक ब्याज मिनाहा गर्न राष्ट्र बैंकमार्फत वाणिज्य बैंकलाई तत्काल निर्देशन गर्नुपर्ने लगायतका माग राख्दै प्रदर्शन गरिएको हो । धम्बोझी चोकबाट सुरु भएको प्रदर्शन जिल्ला प्रशासन कार्यालय पुगेर प्रमुख जिल्ला अधिकारी रामबहादुर कुरुङवाङमार्फत् सरकारलाई विभिन्न राहत प्याकेजको माग समेटिएको ज्ञापन पत्र बुझाएका छन् ।
यस्तै, राज्यलाई बुझाउने सम्पूर्ण राजस्व कर लकडाउन खुलेको तीन महिनापछिको समय निर्धारण गर्नुपर्ने, उद्योग व्यवसायमा कार्यरत श्रमिकको तलब भुक्तानका लागि सरकार, व्यवसायी र श्रमिकको समान साझेदारीमा भुक्तान हुने व्यवस्था गर्नुपर्नेलगायत माग ज्ञापन पत्रमा समावेश गरिएको छ ।
