प्रशिद्धिका खड्का
काठमाडौं, कात्तिक १२ । लामो समयदेखि हुन नसकेको नेपाल र मलेसियाबीच श्रम समझदारी भएको छ । सोमबार श्रम, रोजगार तथा सामाजिक सुरक्षामन्त्री गोकर्ण बिष्ट र मलेसियाका मानव संसाधनमन्त्री एम कुलासेगरनले समझदारीपत्रमा हस्ताक्षर गरेका छन् ।
श्रम सम्झौतामा हस्ताक्षर भएसँगै मलेसिया रोजगारीमा जाने कामदारमाथि हुँदै आएको आर्थिक शोषण पूर्ण रुपमा अन्त्य भएको छ । म्यानपावर कम्पनी, एजेन्ट र विभिन्न संस्थामार्फत मलेसिया जाने कामदार ठगिँदै आएका थिए ।
कामदार आपूर्ति गर्दा लाग्ने खर्च रोजगारदाता कम्पनीले नै व्योहोर्ने व्यवस्था समझदारी पत्रमा उल्लेख छ । मलेसियामा कार्यरत कामदारलाई प्रत्येक महिनाको ७ गतेभित्र रोजगारदाता कम्पनील बैकमार्फत तलब भुत्तानी गर्नुपर्ने भएको छ । श्रम स्वीकृति दुई वर्षका लागि जारी गरिने छ । यसअघि ३ वर्षका लागि श्रम स्वीकृति जारी हुँदै आएको थियो । रोजगारीका क्रममा बिरामी भए स्वदेश फर्किदा रोजगादाता देशले नै आवतजावत खर्च र उपचार खर्च व्योहोर्नु पर्ने भएको छ ।