छिनछिन खबर
काठमाडौं, वैशाख १९ । ३३ किलो सुन तस्करी प्रकरणमा बुधबार प्रहरीले ६२ जना विरुद्ध मद्दा दर्ता गर्ने तयारी गरेको छ । ३३ किलो सुन तस्करीसँगै सनम शाक्य हत्या भएपछि तातिएको प्रहरीले बहालवाला र सेवा निवृत्त अधिकारीसहित ६२ जनाविरुद्ध मोरङ जिल्ला अदालतमा मुद्दा दर्ता गर्ने तयारी गरेको हो ।
हालसम्म उक्त प्रकरणमा प्रहरीले २८ जनालाई पक्राउ गरिसकेको छ । प्रहरी स्रोतका अनुसार मिसिल सरकारी वकिलको कार्यालयमा बुझाएपछि अभियोग पत्र तयार पारी उनीहरुविरुद्ध तीन प्रकारको मुद्दा दर्ता हुँदैछ ।
पक्राउ पर्नेहरूलाई अपहरण, कर्तव्य ज्यान र संगठित अपराधमा मुद्दा चलाउने मोरङ प्रहरीले जनाएको छ । चूडामणि उप्रेती ‘गोरे’ लाई मुख्य अभियुक्त बनाइएको छ । गोरे भने फरार छन् ।
सरकारी वकिलको कार्यालयले फरार रहेका मुख्य अभियुक्त उप्रेतीलाई संगठित अपराध तथा अपहरण गरी कर्तव्य ज्यान मुद्दा दायर गर्नेछ भने अन्य पक्राउ परेका २८ जनालाई छुट्टाछुटै मुद्दा दर्ता गर्नेछ ।
सुन तस्करी प्रकरणमा बहालवाला र पूर्व गरी ६ प्रहरी अधिकारी, तीन व्यापारी, सनम शाक्य हत्यामा जोडिएका ६ प्रतिवादी र विमानस्थलमा कार्यरत १३ प्रतिवादीविरुद्ध मुद्दा दर्ता गराउन लागिएको हो । संगठित सुन तस्करीमा यति धेरै बहालवाला प्रहरी अधिकारीलाई प्रतिवादी बनाइएको यो पहिलो घटना हो ।
यी हुन् आरोपित
पूर्वडीआईजी गोविन्द निरौला, एसपी विकासराज खनाल, डीएसपीद्वय प्रजित केसी, सञ्जय राउत, सई बालकृष्ण सन्जेल र जवान विष्णुबहादुर खड्कालाई संगठित अपराध सम्वन्धी मुद्दा चलाउने तयारी गरिएको मोरङ प्रहरीले जनाएको छ ।
त्यस्तै प्रहरी नियन्त्रणमा रहेका विमानस्थलका कर्मचारी लालबहादुर मगर, हेमन्त गौचन, वीरेन्द्रमान श्रेष्ठ, सम्बिर तोलाङ्गे, बालकृष्ण श्रेष्ठ, दोरम खत्री, कपिलराज पुरी, गोपाल श्रेष्ठ, पुण्य लामा, राजन थापा, राजु महर्जन, अमर डंगोल, तुलाराम थारू विरुद्ध पनि संगठित अपराधमा मुद्दा दर्ता गरिने तयारी भइरहेको छ ।
व्यापारीहरु महावीर गोल्यान राजेन्द्रमान शाक्य र राप्रपा नेता भुजुङ गुरुङलाई पनि संगठित अपराधमा मुद्दा दर्ता गरिने छ ।
मोहन कार्की, एकराज मल्ल, नरेन्द्र कार्की, लाक्पा शेर्पा, माधव भन्ने मोहन घिमिरेलाई सनम हत्याका प्रतिवादी बनाइएको छ । उनीहरु विरुद्ध कर्तव्य ज्यान र संगठित अपराध सम्वन्धी मुद्दा दर्ता गर्ने तयारी भएको छ ।
सुन गायब र हत्यामा प्रहरीकै मिलेमतो रहेको आशंकामा अनुसन्धानका लागि गृह मन्त्रालयले सहसचिव ईश्वर पौडेलको नेतृत्वको छानवीन समिति गठन गरेको थियो ।
विमानस्थलबाट गत माघ ७ गते तस्करी भएको साढे ३३ किलो सुन हराएपछि तस्करीका नाइके चूडामणि उप्रेती ‘गोरे’ नेतृत्वको समूहले सनम शाक्यलाई गत फागुन १८ गते हत्या गरेको थियो । शवलाई गायब बनाउन लैजाँदै गर्दा प्रहरीले विराटनगरबाट फागुन १९ गते शाक्यको शव फेला पारेको थियो ।
साढे ३३ किलो सुन प्रकरणमा तानिएका एसएसपी दिवेश लोहनी पनि जिल्ला प्रहरी कार्यालय मोरङको सम्पर्कमा पुगेका छन् । छानबिन समितिले पत्र काटेको भोलिपल्ट लोहनी मोरङ पुगेका हुन् ।
