नेपालगन्ज-पुर्वप्रधानमन्त्री एवम् नेकपा माओबादी केन्द्रका अध्यक्ष पुष्पकमल दाहाल प्रचण्डले अब बन्ने वामपन्थी सरकारले देशको आर्थिक विकासमा गति दिने दाबी गरेका छन् । नेपालगन्जमा बिहीबार प्रादेशिक महोत्सव उद्घाटन गर्दै उनले सार्वजनिक र निजी क्षेत्रको सहकार्य विना आर्थिक विकासले गति लिन नसक्ने स्पष्ट पारे । मुलुकलाई छिटोभन्दा छिटो आर्थिक विकासमा लैजान, बेरोजगारी समस्या अन्त्य गर्न र लाखौं युवालाई स्वदेशमै रोजगारीको वातावरण सिर्जना गर्न सबैले नयाँ संकल्प गर्न जरुरी रहेको उनले बताए । 
आफ्नो प्रधानमन्त्रीत्वकालमा नेपालको ईतिहासमै सबैभन्दा बढी आर्थिक वृद्धिदर भएको जिकिर गर्दै दाहालले यसबाट अब बन्ने वामपन्थी सरकारले देशको आर्थिक विकासमा गति दिन्छ भन्ने आधार बनेको बताए । नेपालगन्जलाई प्रादेशिक राजधानी नबनाएको गुनासो सुनेपछि उनले कुनैपनि हालतमा बाँकेलाई आफुले पछाडी पर्न नदिने आश्वासन दिए । ‘नेपालगन्जले खेलेको ऐतिहासिक भुमिकाको बारेमा धेरै ईतिहासको पानामा लेखिएका छन्, मैले पढेको छु, मैले धेरै पटक तपाईसँग भनेको छु, म तपाईको साथमा छु,’ उनले भने ।
आफुले काठमाडौं गएपछि सबै राजनीतिक दलसँग छलफल गरेर प्रादेशिक राजधानीका विषयमा सकारात्मक पहल गर्ने प्रतिवद्धता जनाए । दाहालले थपे, ‘अहिले अस्थायी केन्द्र मात्र तोकिएको छ, रियल राजधानी बनाउन बाँकी छ, तर मान्नुस नेपालगन्ज नै राजधानी भएपनि सबै अफिस नेपालगन्जमा हुनुहुदैन, केही दाङमा केही बुटवलमा हुनुपर्छ ।’ 
