काठमाडौं, वैशाख २-
राष्ट्रिय प्रजातन्त्र पार्टी (राप्रपा) ले निर्वाचन आयोगविरुद्ध जनमत सिर्जना गर्ने निर्णय गरेको छ । आयोगले विधानबाट संवैधानिक राजसंस्था र हिन्दू राष्ट्र खारेज गर्न गरेको निर्णयविरुद्ध राप्रपाले यही वैशाख ५ गते ७४४ वटै स्थानीय तहमा जनमत सिर्जना गर्ने भएको हो । पार्टीको आज बसेको केन्द्रीय पदाधिकारीको बैठकले स्थानीय तहमा जनतालाई त्यस विषयमा बुझाउने तथा दबाबमूलक सशक्त विरोधका कार्यक्रम गर्नेबारेमा निर्णय गरेको हो। पार्टी अध्यक्ष कमल थापाको अध्यक्षतामा केन्द्रीय कार्यालयमा बसेको बैठकले यही वैशाख ८ गते देशभर रहेका निर्वाचन कार्यालयमा ध्यानाकर्षण गराउने तथा कार्यालय अगाडि विरोध प्रदर्शन गर्ने निर्णय गरेको छ ।
सो पार्टीका विधानमा रहेका विभिन्न बुँदामध्ये ती दुई बुँदा पछिल्लो संविधान अनुकूल नरहेको भन्दै निर्वाचन आयोगले गत चैत ४ गते खारेज गर्ने निर्णय गरेको बताइएको छ ।
