काठमाडौं, मंसिर २८-
प्रधानमन्त्री निवास बालुवाटारमा भएको शीर्ष नेताको छलफल सकारात्मक बन्दै गएको छ । संविधान संशोधन प्रस्ताव, स्थानीय निकायको निर्वाचन, महाअभियोगको विषय तथा, पुर्नसंरचना आयोगका विषयमा प्रमुख तीन दलका शीर्ष नेताबीच सकारात्मक छलफल भएको स्रोतले जनाएको छ ।
प्रधानमन्त्री पुष्पकमल दाहालको आह्वानमा मंगलबार बिहान बसेको प्रमुख तीन दलका शीर्ष नेताको बैठकमा सबै विषयमा प्याकेजमा सहमती खोज्ने विषयमा सकारात्मक छलफल भएको बैठकपछि कांग्रेस सभापति शेरबहादुर देउवाले जानकारी दिएका छन् । एमाले अध्यक्ष केपी ओलीले संशोधन प्रस्ताव फिर्ता लिनुपर्ने माग राख्दै मुलुकलाई निर्वाचनतर्फ लैजान निर्वाचन सम्बन्धी कानुन संसदमा ल्याउन आग्रह गरेका थिए ।
जवाफमा प्रधानमन्त्रीले असन्तुष्ट पक्षलाई पनि कहीँ न कहीं ठाउँ दिनुपर्ने भन्दै सबैको सहमतिमा निर्वाचनमा जानुपर्ने बताएका थिए । सरकारले मंसिर १४ गते संसदमा दर्ता गराएको संविधान संशोधनपछि प्रमुख प्रतिपक्ष नेकपा एमालेसहित प्रतिपक्ष दलहरुले निरन्तर संसद अबरुद्ध पार्दै आएका छन भने दलहरुबीचको दूरीसमेत बढेको छ ।
