नेपालगन्ज, भदौं १२–
छिनछिन खबरले शनिबार गरेको फेसबुक मत सर्वेक्षणले बैश्यले चुनाव जित्ने अनुमान गरे बमोजिम नै नेपालगन्ज उद्योग वाणिज्य संघको अध्यक्षमा नन्दलाल बैश्य भारी मतले विजयी भएका छन् । तीन वर्षे कार्यकालका लागि भएको निर्वाचनबाट समावेशी प्यानलका बैश्य अध्यक्षमा विजयी भएका हुन् । आइतबार बेलुका सार्वजनिक भएको मत गणनाको परिणाम अनुसार बैश्यले १४८० मत प्राप्त गरेका छन् ।
उनका निकटतम प्रतिद्वन्द्वी प्रजातान्त्रिक उद्योगी व्यवसायी समूहका गोपालप्रसाद अधिकारीले ५८३ र समावेशी साझा समूहका कपिलप्रसाद अधिकारीले ४६० मत प्राप्त गरेको प्रमुख निर्वाचन अधिकृत भोलासिंह हमालले जानकारी दिए । उनका अनुसार उपाध्यक्ष(उद्योग)मा सोही समूहका अब्दुल वाहिद मन्सुरी र उपाध्यक्ष(वाणिज्य) मा दुर्गाप्रसाद भण्डारी विजयी भएका छन् ।
सदस्य पदमा धु्रव दाहाल, तपेन्द्र शाह, आदेशकुमार अग्रवाल, अजयकुमार टण्डन, रोहितकुमार टण्डन, अब्दुल वाहिद अन्सारी, अभयकुमार बस्नेत, ताराकुमारी खत्री, सुनील सिंघल, टंक धामी, श्यामसुन्दर अधिकारी र हरिषचन्द्र श्रेष्ठ विजयी भएका छन् ।
निर्वाचनबाट एशोसियट सदस्यमा कन्हैयालाल बैद्य र सञ्जय जैन तथा सम्बद्ध सदस्यमा नारायण ज्ञवाली र रमेश शाह निर्वाचित भएका छन् । संघको कूल २९२६ मतदाता मध्ये शनिबार सम्पन्न भएको निर्वाचनमा २६१० मत खसेको थियो । निर्वाचनमा १९ पदका लागि तीनवटा प्यानल र स्वतन्त्र गरी ६१ जनाको उम्मेदवारी परेको थियो ।
२०६३ सालमा पहिलोपटक संघको कार्यसमिति सदस्यमा निर्वाचित भएका बैश्यले आफूले समग्र उद्योगी, व्यवसायीको हकहितमा काम गर्ने प्रतिबद्धता जनाए । निर्वाचनमा आपूmलाई सबै दल निकट उद्योगी, व्यवसायीको सहयोग र समर्थन रहेको स्पष्ट पार्दै उनले भने, ‘ उद्योग वाणिज्य संघमा राजनीतिक हाबी हुन दिन्न, सदा संघको मर्यादा र उद्योगी व्यवसायीको हितमा नै काम गर्नेछु ।’
यस अघि छिनछिन खबरले शनिबार गरेको फेसबुक मत सर्वेक्षणले बैश्यले चुनाव जित्ने आँकलन गरेको थियो । सो सर्वेक्षणमा सहभागी ४५ प्रतिशतले बैश्यले नै चुनाव जित्ने अनुमान गरेका थिए ।