नेपालगन्ज, भदौ १०–
बाँकेका १० वटा विद्यालयमा संचालन गरिएको विद्यालय सुरक्षा कार्यक्रमका कारण ती विद्यालयमा सुरक्षा सम्बन्धी विषयमा ठूलो परिवर्तन आएको पाइएको छ ।
बाढी, भूकम्प, हावाहुरी, शीतलहर र अत्यधिक गर्मीलगायतका विभिन्न प्रकारका जोखिम र विपदबाट विद्यालय तथा बालबालिकालाई जोगाउन ठोस उपाय अवलम्बन गर्न र सचेतना प्रदान गर्ने उद्देश्यले सो कार्यक्रम १० वटा विद्यालयमा संचालन गरिएको छ ।
सेभ द चिल्ड्रेनको आर्थिक सहयोगमा बाँके युनेस्को क्लबले संचालन गरेको सो कार्यक्रमका कारण जिल्लाका कचनापुर, बिनौना, बेतहनी र उढरापुर गाविसका १० वटा विद्यालयका करिब ४ हजार बालबालिका विभिन्न प्रकारका विपद र जोखिमबाट सचेत भइरहेका छन् ।
ती विद्यालयमा अध्ययनरत बालबालिकाले आआफ्नो विद्यालयको सुरक्षित र असुरक्षित स्थानको पहिचान गरेर प्रकोप पात्रो निर्माण गर्नुका साथै विपद र जोखिम न्युनिकरण गर्ने वार्षिक कार्ययोजनासमेत तयार गरिसकेको बाँके युनेस्को क्लबका अध्यक्ष प्रवेज अली सिद्दिकीले बताए । उनले सोही कार्यक्रमकै कारण १० वटै विद्यालयको जोखिम नक्साङ्कन गरिएको जनाउँदै ४ विद्यालयमा अति जीर्ण अवस्थामा रहेका कोठा भइरहेको पठनपाठन बन्द गराएर जीर्ण भवन हटाइएको बताए ।
विद्यालय र बालबालिकाको सुरक्षालाई प्रमुख उद्देश्य बनाएर संचालन गरिएको सो कार्यक्रम अन्तर्गत विद्यालय सुधार योजनामा विपद र जोखिम न्युुनिकरण योजना तयार गरेर समावेश गरिएको तथा प्रधानाध्यापक, विद्यालय व्यवस्थापन समिति, शिक्षक र बालबालिकालाई प्राथमिक उपचार तालिम र सुरक्षा सम्बन्धी तालिम प्रदान गरिएको कार्यक्रमका संयोजक दिपेन्द्र चौधरीले बताए । उनले विद्यालयको जोखिम विश्लेषण गरिएको, गैरसंरचनामा देखिएका जोखिमलाई न्युनिकरण गरिएको र विद्यार्थीलाई भूकम्प, बाढीलगायतका विपदबाट जोगिने तरिका सिकाइएको बताए ।
विद्यालय सुरक्षा कार्यक्रम संचालन गरिएपछि विद्यालय र बालबालिकामा ठूलो परिवर्तन आएको जनाउँदै दुर्गा भवानी मावि कचनापुरका प्रधानाध्यापक देवबहादुर थापाले विद्यार्थीले घरधुरी जोखिम न्युनिकरण योजना निर्माण गरेको तथा समुदायमा आधारित विपद व्यवस्थापन समितिलाई पनि विद्यालयसम्म पु¥याइएको बताए । उनले कार्यालयमा छिर्ने बित्तिकै विद्यालय सुरक्षा सम्बन्धी सबै जानकारी स्वतः देख्न पाइने जनाउँदै जीर्ण कोठा हटाइनु, विद्यालय सुधार योजनामा विपद सम्बन्धी योजना समावेश गरिनु र प्रकोप पात्रो निर्माण गरिनु ठूला उपलब्धि भएको बताए ।
दुर्गा भवानी मावि कचनापुरको वयवस्थापन समितिका अध्यक्ष डिल्ली गिरीले यस्ता कार्यक्रम जिल्लाका सबै विद्यालयमा संचालन गर्नु पर्ने माग राखे । बाँकेका सहायक जिल्ला शिक्षा अधिकारी गोर्खबहादुर थापाले सो कार्यक्रमले विद्यालयमा सुरक्षाका विषयमा ठूलो परिवर्तन ल्याएको बताए ।
