नेपालगन्ज, चैत ५–
प्रतिवन्धित झ्याउ अवैध रुपमा भण्डारण तथा ओसार्ने काममा संलग्न रहेको आरोपमा पक्राउ परेका नेपाल जडिबुटी व्यवसायी संघका केन्द्रिय अध्यक्ष मोहम्मद याकुब अन्सारी जेल चलान भएका छन् । बाँके, जिल्ला अदालतका न्यायाधीश बलराम त्रिपाठीको एकल इजलासले प्रतिवन्धित झ्याउ ओसार पसार सम्वन्धी मद्दामा अन्सारीलाई पुर्पक्षका लागि थुनामा राखेर मुद्दाको प्रकृया अगाडी बढाउने आदेश दिएको हो । आदेशपछि अन्सारीलाई जिल्ला कारागार बाँकेमा चलान गरिएको छ ।
नेपाल प्रहरीको केन्द्रिय अनुसन्धान ब्युरो र मध्यपश्चिम क्षेत्रीय प्रहरी कार्यालयले गत फागुन ९ गते नेपालगन्जका १३ वटा जडिबुटीको गोदाममा छापा मारेकोमा राँझास्थित अन्सारीको गोदामबाट ५ सय ४२ बोरा (झण्डै १ सय ३५ क्वीन्टल) प्रतिवन्धित जडिबुटी झ्याउ फेला पारेको थियो । व्यवसायी अन्सारी प्रतिवन्धित जडिबुटी झ्याउ भन्डार र ओसार पसारमा संलग्न रहेको ठहर गर्दै २ लाख ३ हजार २ सय ५० रुपैयाँ बिगो कायम गरी बिगोको दोब्बर जरिवाना, एक वर्ष कैदको माग गर्दै जिल्ला अदालत बाँकेमा मुद्दा दायर गरेको वन कार्यालयले जनाएको छ ।
