क्यानाडा, फागुन ११–
नेपाली जनसम्पर्क समिती (क्यानाडा)ले नेपाली कांग्रेसका सभापति एवम् पुर्वप्रधानमन्त्री स्वर्गिय सुशील कोईरालाको श्रदाञ्जली सभा गरेको छ । समितीले २१ फेब्रुअरीका दिन ग्रेटर टोरोन्टोको मिसिसागास्थित गोर्खा प्यालेसमा उक्त सभा आयोजना गरेको हो । कोईरालाको गत माघ २६ गते असामयिक निधन भएको थियो ।
१३ औं दिनको पुण्य तिथिका अवसरमा गरिएको श्रद्धान्जली सभामा एनआरएन क्यानाडाका अध्यक्ष तुल्सी सापकोटाले स्वर्गिय कोइराला नेपाली कांग्रेसको मात्र नेता नभएर एक राष्ट्रिय व्यक्तित्वका रुपमा रहेको चर्चा गरे । उनको देहावसानले नेपाल तथा नेपालीले जनतालाई अपुरनिय क्षति पुगेको धारणा राखे । राष्ट्रिय व्यक्तित्वको सम्झनामा एनआरएन क्यानाडाले गर्नुपर्ने कार्यक्रमलाई नेपाली जनसम्पर्क समिती क्यानाडाले गरेकोमा सापकोटाले प्रशंसा पनि गरे । आगामी दिनमा एनआरएन क्यानाडा नेपाली जनसम्पर्क समिती क्यानाडासँग सहकार्य गरेर अगाडी बढ्ने प्रतिवद्धता जनाए ।
श्रदाञ्जली सभामा एनआरएन क्यानाडाका प्रवक्ता तथा अन्टारियो संयोजक किस्मत भण्डारीले कोईरालाको त्याग र उच्च विचारले गर्दा नै आज नेपालले संविधान पाएको बताए । कोईराला नेपाली कांग्रेसको मात्र नेता नभएर सबैका लागि उदाहरणीय राष्ट्रिय ब्यक्तित्व बनेको भण्डारीले उल्लेख गरे । कार्यक्रममा पूर्व विद्यार्थी नेता सुरज चालिसेले कोईरालासँगको भेट र उनको मार्ग दर्शनको सम्झना गर्दै देशलाई उनी जस्तो नेताको खाँचो रहेको बताए । यसैगरी एनआरएन क्यानाडा महिला बालबालिका समिती संयोजक प्रमिला बस्नेत, ट्रकर्स एशोसिएशनका अध्यक्ष एन.बी टन्डन लगायतले श्रद्धान्जली सभामा मन्तव्य दिएका थिए ।
श्रद्धान्जली सभामा उपस्थित व्यक्तिलाई नेपाली जनसम्पर्क समिति क्यानाडाका उपसभापति सुरेन्द्र खड्काले स्वागत गरेका थिए, भने उक्त कार्यक्रम नेपाली जनसम्पर्क समिति क्यानाडाका संथापक सभापति बुद्दि ओलीको सभापतित्वमा सम्पन्न भएको थियो । सभामा क्यानाडामा रहेका विभिन्न संघ, संथाका प्रतिनिधी, वकिल, ब्यापारी, पत्रकार, समाजसेवी लगायत उल्लेख्य मात्रामा जिटिए बासीहरुले स्वर्गिय कोईरालाको तस्विरमा अविर लगाएर श्रद्धान्जली दिएका थिए । सो अवसरमा कौशल बस्नेतले स्वर्गिय कोइरालाको जीवनी प्रस्तुत गरेका थिए ।