भगीरथ अवस्थी
बैतडी, कात्तिक १५
जिल्ला विकास समितिबाट चालू आर्थिक वर्षमा सञ्चालन हुने योजना सम्पन्न गर्नका लागि उपभोक्ता समिति गठन गर्ने कार्य सुरु गरिएको छ । उपभोक्ता समिति गठनका लागि योजना कार्यान्वयन हुने सबै गाविसमा पत्राचार गरिसकिएको स्थानीय विकास अधिकारी खेमराज बिष्टले जानकारी दिए १ लाख बढी रकम भएका योजनाको कार्यान्वयनका लागि पत्राचार गरिएको उनले बताए । गत जिल्ला परिषदले पारित गरेका योजना कार्यान्वयनका लागि उपभोक्ता समिति गठन गर्न निर्देशन दिइएको हो ।
उपभोक्ता समिति गठन गर्दा गाविसको समाजिक परिचालक वा गाविस कर्मचारीको रहोवरमा गठन गर्ने प्रावधान गर्ने नियम भए पनि धेरैजसो ठाउँमा उपभोक्ताले समिति गठन गर्ने पाइएको जिल्ला विकास समितिका कर्मचारीले गुनासो छ । यसरी गठन भएका उपभोक्ता समितिमार्फत् काम गर्न असजिलो हुने उनीको भनाइ छ । उपभोक्ता समिति गठन गर्दा अध्यक्ष, सचिव र कोषाध्यक्षमार्फत् एकजना महिला अनिवार्य हुनु पर्ने प्रावधान रहेको जिल्ला विकास समितिका नायव सुब्बा वीर सिंह महताले जानकारी दिए । यसरी समिति गठन गर्दा ३३ प्रतिशत महिला सहभागिता अनिवार्य रहेको छ । उपभोक्ता समिति गठनका साथ साथै ५ सदस्यीय सुपरीवेक्षण तथा अनुगमन समिति गठन गर्नु पर्दछ । तोकिएको समयभित्र उपभोक्ता समिति गठन नभए जिल्ला विकास समितिले विकल्प खोज्ने प्रावधान रहेको जिल्ला शासन विज्ञ लवराज पन्तले जानकारी दिए । अहिले ४२ ओटा योजना सञ्चालनका लागि उपभोक्ता गठन गर्न पत्राचार गरिएको उनले जानकारी दिए ।