डुडुवा (बाँक)– बाँके डुडुवा गाउँपालिका अन्तर्गत रहेका आइसोलेसन र क्वारेन्टाइनबाट शनिबार १८ जना घर फिर्ता भएका छन् । वडा नम्बर २ मा रहेको नेपाल राष्ट्रिय मावि सन्तलियाको आइसोलेसनमा रहेका १० जना र वडा नम्बर ४ शाहपूर्वा क्वारेन्टाइनमा रहेका ८ जना घर फिर्ता भएका हुन् । उनीहरु सबैको स्वास्थ्य रिपोर्ट नेगेटिभ आएपछि घर पठाइएको गाउँपालिका अध्यक्ष नरेन्द्र चौधरीले बताए ।
कोरोना भाइरसको संक्रमण देखिएपछि १८ दिनसम्म उनीहरुलाई आइसोलेसन र क्वारेन्टाइनमा स्वास्थ्यकर्मीको निगरानीमा राखिएको थियो । घर फिर्ता पठाउनु अघि उनीहरुलाई कोरोना भाइरसबाट बच्ने उपाय अपनाउन आग्रह गर्दै स्वास्थ्य सम्बन्धी समस्या आए तुरुन्त खबर गर्न सुझाव दिएर घर पठाइएको छ । गाउँपालिका अध्यक्ष नरेन्द्रकुमार चौधरी, स्वास्थ्य शाखा संयोजक धनबहादुर बुढालगायतले उनीहरुलाई विदाइ गरेका थिए ।
भारतबाट लुकिछिपी आउनेको चाप बढेपछि डुडुवा गाउँपालिकाको क्वारेन्टाइनमा बस्नेको संख्या ह्वात्तै बढेको थियो । हाल ज्ञानदीप माविमा रहेको क्वारेन्टाइनमा ४३ जना, शहिद माविको क्वारेन्टाइनमा १२ जना, सरस्वती माविको क्वारेन्टाइनमा ९ जना रहेको गाउँपालिका स्वास्थ्य शाखा प्रमुख धनबहादुर बुढाले जानकारी दिए । कोरोना भाइरसको जोखिम न्यूनिकरणका लागि गाउँपालिकाले दुईवटा आइसोलेसन र ७ वटा क्वारेन्टाइन निर्माण गरेको छ ।
