छिनछिन खबर
काठमाडौं– शैक्षिक भ्रमणका लागि संयुक्त अरब इमिरेट्सको दुबई गएको बेला निधन भएका सिरहा, मिर्चैयाका गौरव श्रेष्ठका अभिभावकले घटनाको छानबिन गर्न माग गरेका छन् । काठमाडौंको थापाथलीमा रहेको द ब्रिटिस कलेजमा गौरव स्नातक पहिलो वर्षमा अध्ययनरत थिए । दुबई शैक्षिक भ्रमणमा गएको बेला २० वर्षीय गौरवको फागुन २ गते निधन भएको थियो ।
शैक्षिक भ्रमणमा रहेको शिक्षिकाले गौरवको समुद्रमा डुबेर निधन भएको जानकारी दिएका थिए । गौरवका पिता महेन्द्र श्रेष्ठले शनिबार रिपोर्टर्स क्लबमा पत्रकार सम्मेलन गर्दै कलेजको लापरबाहीले छोराको निधन भएको बताए । उनले भ्रमण तालिकामै नभएको स्विमिङ कार्यक्रममा विद्यार्थीलाई कलेजले किन सहभागी गरायो भन्दै प्रश्न गरे । उनले कलेजले आफूमाथि समेत अभद्र व्यवहार गरेको गुनासो गरे । उनले उक्त घटनाबारे प्रहरी परिसर, टेकु, काठमाडौंमा जाहेरी दिएका छन् । उनले द ब्रिटिस कलेजले व्यापारका लागि विद्यार्थीलाई विदेश भ्रमणमा लैजाने गरेको आरोप लगाए ।