छिनछिन खबर
काठमाडौं– नेपाल सरकारका उपसचिव प्रेमप्रसाद सञ्जेलले आफूमाथि अन्यायपूर्ण व्यवहार गरेको भन्दै श्रम, रोजगार तथा सामाजिक सुरक्षा मन्त्रालयविरुद्ध अदालतमा जाने बताएका छन् । मंगलबार राजधानीमा पत्रकार सम्मेलन गर्दै सञ्जेलले यस्तो घोषणा गरेका हुन् ।
श्रम ऐन–२०७४, श्रम नियामावली–२०७५ ले निर्दिष्ट गरेको मजदूरको न्यूनतम पारिश्रमिक, महँगी भक्ता, उपचार विमा, दुर्घटना बीमा, १० प्रतिशत सञ्चय कोष र ८.३३ प्रतिशत सामाजिक सुरक्षा कोष कट्टा नगरी श्रमिकको शोषण गर्ने उद्योगी र उनीहरूसँग साँठगाँठ गरी मजदूरको रगत कमिसन बनाएर पिउने ट्रेड युनियनका पदाधिकारीउपर कारबाही सुरू गर्दा इतिहासमै कसैलाई नगरिएको ७० दिने सरुवा गरिएको उनको भनाइ छ । निजामती सेवा ऐन–२०४९ को दफा (१८) को उपदफा (३) को खण्ड (ख) अनुसार आफूलाई मोरङमा दुई वर्ष काम गर्न दिनुपर्ने व्यवस्थाको उल्लंघन गरिएको उनको भनाइ छ । उनले मन्त्रालयका सचिव महेशप्रसाद दाहालउपर सोही ऐनको उपदफा (१२) बमोजिम कारबाही हुनुपर्ने मागसमेत गरेका छन् ।
उनले सरुवा गैरकानुनी भएको दावी गरे । ‘सरुवा बदर गरी पाऊ भनेर मैले तीन पटक आधिकारिक निकाय सामान्य प्रशासन मन्त्रालयमा लिखित अनुरोध गरिसकेको छ । यो कुरा मैले खुद प्रधानमन्त्रीलाई समेत जानकारी दिएको छु । तर, ६५ दिन बित्दासमेत अहिलेसम्मकुनै सुनुवाइ भएको छैन,’ उनले भने । उनले आफूममाथि गरिएको अन्यायपूर्ण व्यवहारको विरूद्धमा सर्वोच्च अदालत जाने बताए । उनले सचिव दाहाललाई विभागीय कारबाही गर्नू, गराउनू भन्ने परमादेशको आदेशसमेत नेपाल सरकार, मन्त्रिपरिषदसमेतको नाममा जारी गरी पाऊ भन्ने आफ्नो मूल माग दाबी रहेको बताए । पछिल्लो समयमा नेपालमा भ्रष्टाचारले संस्थागत रूप लिएको समेत उनले दाबी गरेका छन् ।
