एजेन्सी– अन्तर्राष्ट्रिय मुद्रा कोष (आइएमएफ) ले विश्वका सबै देशहरुलाई आर्थिक बृद्धि अनुमानभन्दा कम देखिएकाले ठूलो आर्थिक आँधीका लागि तयार रहन चेतावनी दिएको छ । आइएमएफकी प्रबन्ध निर्देशक क्रिस्टिन लेगार्डले दुबईमा आयोजित वल्र्ड गभरमेन्ट समिटमा अनुमान भन्दा अधिक कम गतिमा आर्थिक वृद्धि भइरहेको बताइन् । गत महिना आइएमएफले यस वर्षका लागि आफ्नो आर्थिक वृद्धिदरको पूर्वानुमान ३.७ प्रतिशतबाट घटाएर ३.५ बनाएको थियो ।लेगार्डले विश्व अर्थव्यवस्थालाई कमजोर बनाउने मुख्य कारकका रुपमा अमेरिका र चीनबीचको व्यापार युद्ध र कर वृद्धि, वित्तिय कडाई, अनिश्चित ब्रेक्जिट परिणाम र चीनियाँ अर्थव्यवस्थाको सुस्तता गरी ४ वटा तत्व रहेको र त्यसले आँधी ल्याउन सक्ने चेतावनी दिएकी छन् ।
उनले विश्वका दुई ठूला अर्थब्यवस्था भएका मुलुक अमेरिका र चीनबीचको व्यापार युद्धले विश्व अर्थव्यवस्थामा पहिले नै असर देखाउन सुरु गरिसकेको बताइन् । उनले भनिन् ’हामीलाई यसको कुनै अनुमान छैन कि यो कसरी चलिरहेको छ र हामीलाई थाहा छ कि, यसको असर ब्यापार तथा विश्व बजारमा देखिन सुरु भैसकेको छ ।’ लेगार्डले सरकार, फर्म र घरपरिवारद्धारा लिइएको ऋणको बढ्दो लागतलाई पनि जोखिमको कारक तत्वका रुपमा पनि संकेत गरेकी छन् । उनले भनिन्, ‘जब धेरै बादल हुन्छन्, तब एउटा चट्याङले नै आँधी ल्याउन सक्छ ।’