छिनछिन खबर
काठमाडौं– एकदशक भन्दा बढी समयदेखि मधेसमा भूमिगत जयकृष्ण गोइत नेतृत्वको जनतान्त्रिक मुक्ति मोर्चा क्रान्तिकारीका ११ जना नेताहरुले आत्मसमर्पण गरेका छन् । राजविराजमा सरकारी वार्ताटोली समक्ष बुधबार मोर्चाका समुहका अविनाशसहित ११ सदस्यले १३ थान हतियारसहित आत्मसमपर्ण गरेका हुन् । यसअघि गोइत समुहको १५ सदस्यीय समिति रहेको बताइएको थियो ।
आत्मसमर्पण गर्नेहरुमा अविनाशसहित नथुनी यादव, रामपुकार साह, योगेन्द्र यादव, भवानीप्रसाद अगरिया यादव, बद्री यादव, मो.सफिर, देवेन्द्र खड्गा, सञ्जयकुमार यादव र फुलकुमार यादव लगायत छन् । आत्मसमपर्ण गर्ने समुहले १० थान कटुव पेस्तोल, १२ थन गोली २ थान रिभल्बर पनि बुझाएका छन् । कार्यक्रममा सरकारी वार्ता टोलीका संयोजक सोमप्रसाद पाण्डेसहित सदस्य सुरेश आलेमगर, ताराकान्त चौधरी, राष्ट्रियसभा सदस्य सुमनराज प्याकुरेल, प्रदेशसभा सदस्य गोबिन्द न्यौपाने साथै सुरक्षा निकायका प्रमुख सञ्चारकर्मी र अधिकारकर्मीको उपस्थिति थियो ।