छिनछिन खबर
काठमाडौं– सार्वजनिक खरिद अनुगमन कार्यालय (पिपिएमओ) ले नेपाल वायुसेवा निगमले वाइडबडी जहाज खरिद गर्दा सुरुको प्रक्रियादेखि नै गडबडी भएको जनाएको छ । निगमले जहाज खरिद गर्दा एउटा मात्र कम्पनीलाई मात्रै लक्षित गर्दै ‘स्पेसिफिकेसन’ तयार गरेको कार्यालयले जनाएको छ ।
खरिद ऐनविपरीत निगमले खास ब्रान्ड, ट्रेडमार्क, नाम पेटेन्ट डिजाइन, प्रकार उत्पति वा उत्पादक उल्लेख गरेको कार्यालयको ठहर छ । निगमले ऐनविपरीत रोल्स रोयस ट्रेन्ट ७७२बी इन्जिनसहितको एयर बसको ए ३३०–२०० निर्धारण गरी आरएफपी जारी गरिएको लेखा समितिलाई पिपिएमओले जवाफ दिएको छ ।
साथै निगमले जहाज खरिदको मूल्य तय गर्दासमेत गडबडी गरेको कार्यालयको ठहर छ । कार्यालयले निगमले जहाज खरिदमा अनेकौं गल्ती गरेको समेत ठहर गरेको छ ।