मुलुकले आज दोस्रो राष्ट्रपति पाउने

काठमाडौं, कात्तिक ११–
मुलुकले आज दोस्रो राष्ट्रपति पाउने भएको छ । दोस्रो राष्ट्रपति चयनका लागि बुधबार आज व्यवस्थापिका संसदमा निर्वाचन हुँदैछ । बिहान ११ बजेदेखि २ बजेसम्म राष्ट्रपति उम्मेदवारका लागि मतदान हुने कार्यतालिका छ । व्यवस्थापिका संसदमा कायम रहेका सांसदमध्ये ३०१ मत ल्याउने उम्मेदवार विजयी हुनेछन् । अन्य प्रमुख पदका लागि व्यवस्था नभए पनि राष्ट्रपतिको चयन भने गोप्य मतदानद्वारा गरिनेछ ।
राष्ट्रपति पदमा सत्तारुढ गठबन्धनबाट एमाले उपाध्यक्ष विद्यादेवी भण्डारी र प्रमुख विपक्षी दल कांग्रेसबाट केन्द्रीय सदस्य कुलबहादुर गुरुङ प्रतिस्पर्धामा छन् । भण्डारी र गुरुङसँगै मंगलबार उम्मेदवारी दर्ता गराएका नेमकिपाका नारायण महर्जनले उम्मेदवारी फिर्ता लिएपछि मैदानमा भण्डारी र गुरुङ मात्र छन् । बहुमतीय आधारमा हुने मतदानबाट भण्डारी निवार्चित हुनेमा एमालेसहित सत्तारुढ पंक्ति ढुक्क देखिन्छ ।
सत्तारूढ दलका तर्फबाट एमाले उपाध्यक्ष भण्डारीले व्यवस्थापिका संसदको कार्यातालिका अनुसार राष्ट्रपति पदमा सुरुमै उम्मेदवारी दर्ता गराएकी थिइन् । एकीकृत नेकपा माओवादी अध्यक्ष पुष्पकमल दाहाल प्रस्तावक तथा राप्रपा नेपालका अध्यक्ष कमल थापा समर्थक रहेर नेत्री भण्डारीले उम्मेदवारी दर्ता गराएकी हुन् । उनको उम्मेदवारी दर्ता कार्यक्रममा दाहाल र थापासहित माधवकुमार नेपाल, नेता दीपक बोहोरा, चित्रबहादुर केसीलगायत सत्तारूढ गठबन्धनका प्रमुख नेता र प्रमुख सचेतकको उपस्थिति थियो । राष्ट्रपति पदका लागि महिला उम्मेदवार बनेको यो पहिलोपटक हो ।
व्यवस्थापिका संसदभित्र प्रतिनिधित्व गर्ने १४ भन्दा बढी दलले भण्डारीको उम्मेदवारीमा समर्थन जनाएका छन् । ५४ वर्षीया नेत्री भण्डारी नेकपा एमालेका तत्कालीन महासचिव मदन भण्डारीकी पत्नी हुन् । काठमाडौं–१ का तत्कालीन सांसद मदनको २०५० साल जेठ ३ गते दासढुंगा दुर्घटनामा मृत्यु भएपछि उप–निर्वाचनमा विद्या भण्डारीले नेपाली कांग्रेसका तत्कालीन सभापति कृष्णप्रसाद भट्टराईलाई पराजित गरेकी थिइन् । उनी सातौं र आठौं दुवै महाधिवेशनबाट निर्वा्चित पार्टी उपाध्यक्ष समेत हुन् । भण्डारी हाल समानुपातिकतर्फबाट व्यवस्थापिका संसदमा प्रतिनिधित्व गर्छिन् । दोस्रोपटक हुन लागेको राष्ट्रपति निर्वाचनमा विजयी भए नेत्री भण्डारी पहिलो महिला राष्ट्रपति बन्नेछिन् ।
अर्का उम्मेदवार गुरुङलाई आफ्नै पार्टी कांग्रेसको मात्रै समर्थन छ । व्यवस्थापिका संसदको सबैभन्दा ठूलो दल कांग्रेसले आफ्ना दुई महामन्त्री प्रकाशमान सिंह प्रस्तावक र कृष्णप्रसाद सिटौला समर्थक रहेर गुरुङको उम्मेदवारी दर्ता गराएको हो । प्रधानमन्त्री निर्वाचनमा कांग्रेसलाई सहयोग गरेका तराई–मधेसकेन्द्रित दलले राष्ट्रपति निर्वाचनमा भाग नलिने निर्णय गरेकाले कांग्रेस एक्लो हुने सम्भावना देखिन्छ । ४५ वर्ष उमेर पुगेको तथा निवार्चित र राजनीतिक निर्णयबाट मनोनीतसहित सरकारी लाभको पद नलिएकाले राष्ट्रपतिका लागि उम्मेदवारी दिन सक्ने कानुनी व्यवस्था छ ।

छिनछिन खबर