छिनछिन खबर
काठमाडौं– राजस्व अनुसन्धान विभागले नक्कली भ्याट बिल प्रयोग गरेर राजस्व छलेको दावी गर्दै पेप्सी उत्पादक कम्पनी वरुण वेभेरेजका संचालकविरुद्द मुद्दा दर्ता गरेको छ । विभागका महानिर्देशक दीर्घराज मैनालीले वरुण वेभरेजले नक्कली भ्याटबिल प्रयोग गरेर राजस्व छली गरेको पुष्टी भएपछि मुद्दा दायर गरिएको बताए ।
‘बहुराष्ट्रिय कम्पनीले नै नेपालमा नक्कली भ्याट बिल प्रयोग गरेर राजस्व छली गर्नु राम्रो होइन, ठूलो कम्पनीले नै कानून विपरितको काम गरेको देखियो,’मैनालीले पत्रकार सम्मेलनमा भने । पेप्सीको उत्पादक कम्पनी वरुण वेभरेजले २५ करोड ३४ लाख रुपैयाँ नक्कली भ्याटबिल प्रयोग गरेको छ । आयकर तर्फ भने वरुण वेभरेजले ३९ करोड ६१ लाख रुपैयाँ ठगेको थियो । विभागले ६४ करोड ९६ लाख रुपैयाँ बिगो कायम राखेर त्यसको दोब्बर १ अर्ब ९४ करोड जम्म जरिवाना र ३ वर्षसम्म सजाय माग राख्दै काठमाडौं जिल्ला अदालतमा बिहीबार मुद्दा दायर गरेको छ ।
विभागले वेभरेजका संचालक अमित गुप्ता, रविकान्त ताजपुरिया,रोहित कोहली, प्रविन कुमार अग्रवाल, बिनोदकुमार सिहं विरुद्द पनि जेल सजाय माग राखेको छ । वरुण वेभरेज भारतीय कम्पनी हो । जसले नेपालमा अमेरिकन पेय उत्पादक कम्पनी पेप्सीको उत्पादन तथा बिक्री गर्दै आएको छ ।
