नेपालगन्ज, भदौं १५–
नेपाल बिद्युत प्राधिकरण नेपालगन्ज वितरण केन्द्र मार्फत बितरित बिद्युतमा भइरहेको अनियमितता विरुद्ध बाँके सितापुरका किसानहरु ज्ञापन पत्र सहित बुधबार बिद्युत कार्यालय पुगेका छन् । लामो समयदेखि पानी नपर्दा परेको खडेरी र बिद्युत अनियमिताका कारण किसानले लगाएको धान बाली ५० प्रतिशत नष्ट भएको भन्दै बाँकी बचेको धान बाली जोगाउन बिद्युत नियमित गर्न उनीहरुले अनुरोध गरेका हुन् । झण्डै ५०/६० जना किसानहरु नेपाल बिद्युत प्राधिकरण नेपालगन्ज वितरण केन्द्र पुगेका थिए ।
सितापुर गाविस वडा नम्वर ५ वडा नागरिक मन्चका संयोजक गंगा थापाको अगुवाईमा आफ्ना गुनासो राख्न बिद्युत पुगेका थिए । बिद्युत कार्यालय पुगेका किसानले बिद्युत प्राधिकरण नेपालगन्ज वितरण केन्द्र प्रमुख उमेशकुमार झाँ समक्ष आफ्ना गुनासा तथा समस्याहरु पोखेका थिए । ज्ञापनपत्र हस्तान्तरणको सहजिकरण गर्दै बासका कार्यक्रम अधिकृत हेमराज भट्टले किसानहरुको समस्यालाई ध्यानमा राख्न प्रमुख झाँलाई अनुरोध गरेका थिए ।
उनले बिद्युत प्राधिकरणले प्रभावकारी सञ्चारमा ध्यान दिनुपर्नेमा जोड दिएका थिए । प्रमुखसँगको भेटमा किसानले झ्याप झ्याप बत्ति आउँदा–जादा भएको क्षति, लो भोल्टेजबाट परेको मर्का लगायतका बिषयमा गुनासा राखेका थिए । सिचाईका लागि लगातार ४ घण्टा बिद्युत सप्लाई आवश्यक पर्ने भएकाले उपलब्ध गराउन किसानहरुले गरेको अनुरोधलाई प्रमुख झाँले स्वीकार गर्दै दिनमा जसरी भएपनि ४ घण्टा नियमित बिद्युत दिने ब्यवस्था मिलाउने आश्वासन दिएका छन् । ज्ञापन पत्र बुझ्दै प्रमुख झाले पत्र मार्फत गरिएको मागलाई तत्काल केन्द्रमा पठाउने प्रतिवद्धता जनाए ।