भक्तपुर, साउन २१ –
नेकपा एमाले अध्यक्ष तथा पूर्वप्रधानमन्त्री केपी शर्मा ओलीसँग चिनियाँ राजदूत ऊ चुन्ताईले ओली निवास बालकोटमा शुक्रबार भेटवार्ता गरेका छन्। भेटवार्ताका क्रममा ९ महिना सरकारको नेतृत्व गर्दा नेपाल र चीनबीच द्वीपक्षीय दीर्घकालीन हितका विषयमा महत्वपूर्ण सम्झौता भएको भन्दै कार्यान्वयन हुने विश्वास राजदूतले व्यक्त गरेका छन् । उनले नेपाल र चीनबीच ‘कनेक्टिभिटी’, नेपालको विकासमा चिनियाँ लगानी र सहयोगलाई द्वीपक्षीय समझदारीमा अघि बढाइएको र त्यसका सकारात्मक परिणाम आइरहेको समेत राजदूतले बताए। करिब एक घण्टा भएको वार्तामा नेपालको विकासमा चीन सधंै सहयोगी रहने समेत राजदूतले बताए।
एमाले अध्यक्ष तथा पूर्वप्रधानमन्त्री ओलीले आफ्नो कार्यकालमा नेपाल र चीनबीच पारवहन तथा यातायातलगायत ऐतिहासिक सम्झौता भएकोमा सन्तोष लागेको भन्दै तिनले नेपालको विकासलाई अघि बढाउन महत्वपूर्ण भूमिका खेल्ने बताए। उनले नेपालको विकासमा दुबै छिमेकी चीन र भारतलाई उतिकै महत्वकासाथ सहभागी हुन आग्रह गरिएको र सन्तुलनका आधारमा वैदेशिक सम्बन्ध अघि बढाएको बताए। चीनसँगका सम्झौता र समझदारी नेपालको हितमा रहेको भन्दै त्यसलाई कुनै देश लक्षित रुपमा बुझ्नु नहुने ओलीले बताए।