नेपालगन्ज, साउन १२–
राप्तीको बाढी फसेका होलिया, बेतहनी, कचनापुर र गंगापुरका कुल ८ सय ९८ जनाको उद्धार गरिएको छ । मंगलबार र बुधबार गरी नेपाली सेना, सशस्त्र प्रहरी र प्रहरीले उद्धार गरेका हुन् । बुधबार मात्रै थप २ सय २५ जनाको बुधबार उद्धार गरिएको बाँकेका प्रमुख जिल्ला अधिकारी रबिलाल पन्थले जानकारी दिएका छन् । होलिया–३ र ४ चौफेरी गाउँका १ सय ४ जनालाई बुधबार हेलिकप्टरबाट र गंगापुर–१ कुडवा गाउँका १ सय २१ जनालाई डुंगाको सहायताले उद्धार गरिएको उनले बताए ।
चौफेरी गाउँका बाढी पीडितलाई होलिया–७ पिप्रहवा गाउँमा छाडिएको छ, भने गंगापुरका पीडितलाई सोही गाविसको वडा नम्वर ९ स्थित रेडक्रसको अस्थायी आवासमा राखिएको छ । यसअघि मंगलबार पनि होलिया, बेतहनी र कचनापुरका ६ सय ७३ जनाको हेलिकप्टर, डुंगा लगायत साधनबाट उद्धार गरिएको थियो । प्रजिअ पन्थका अनुसार पहलमा ४ सय ९८ जनाको हेलिकप्टर मार्फत र १ सय ७५ जनालाई डुंगा र पौडी खेलेर सुरक्षाकर्मीले उद्धार गरेका थिए । उद्धारमा रेडक्रसका स्वयंसेवकले पनि सुरक्षाकर्मीलाई सघाएका छन् । प्रजिअ पन्थले उद्धार कार्यमा हेलिकप्टर र डुंगा प्रयोग गरिएको जानकारी दिदै भने, ‘नदीमा पानीको सतह बढेको पुर्व जानकारी पाउनु र नेपाली सेनाले यसपटक सुर्खेतमा हेलिकप्टर स्ट्यान्डबाई हुनुले उद्धार कार्य गर्न सहज भयो ।’
जिल्ला आपतकालिन कार्य सञ्चालन केन्द्रका गौरीलाल बुढाथोकीले सुरक्षित स्थानमा राखिएका व्यक्तिलाई प्रति घर तीन दिनका लागि तयारी खाना प्रति व्यक्ति (चिउरा ६ सय ग्राम, चिनी ७५ ग्राम, चाउचाउ ३ वटा र बिस्कुट ३ वटा) वितरण गरिएको जानकारी दिएका छन् । राप्तीमा पानीको सतह अचानक बढेपछि राप्ती आसपासका होलिया, फत्तेपुर, गंगापुर, मटेहिया, बेतहनी, खासकुश्मा, कचनापुर, बैजापुर, बिनौना लगायत गाविसका विभिन्न वडा तथा गाउँहरु डुबानमा परेका थिए । कुसुमस्थित बाढी मापन केन्द्रमा मंगलबार राती साढे ११ बजे सम्म नदीमा पानीको सतह बढेर ८ मिटर १५ सेन्टिमिटर सम्म पुगेको थियो । कुसुममा मंगलबार रातीबाट पानीको सतह घटेपनि प्रभावित क्षेत्रमा भने बुधबार दिउँसो मात्र बाढी घटेको स्थानीय बासिन्दाले बताएका छन् ।
