काठमाडौं–प्रतिनिधि सभा पुनसर््थापना गर्ने सर्वोच्चको फैसलापछि नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ’प्रचण्ड’ ले राष्ट्रपति विद्यादेवी भण्डारीलाई नहटाउने र प्रधानमन्त्री केपी शर्मा ओलीसँग सहकार्य हुन नसक्ने बताएका छन् । प्रचण्डले बिबिसी नेपाली सेवालाई दिएको अन्तर्वार्ताको अंश ।
प्रतिनिधि सभा पुनःस्थापना भयो । अब प्रधानमन्त्री तपाई बन्ने कि कांग्रेस सभापति शेरबहादुर देउवा ?
प्रधानमन्त्रीका बारेमा हामी पुरै खुला छौं । मैले पहिले पनि भनेको छु । हाम्रो प्राथमिकता प्रधानमन्त्री हुने होइन । प्रधानमन्त्री हुनका लागि हामीले आन्दोलन गरेका पनि होइनौं । नेपाली कांग्रेस, जनता समाजवादी लगायत अरु दलसँग समझदारी गरेर अघि जाने कुरा हुन्छ ।
प्रधानमन्त्री ओलीविरुद्ध ल्याइएको अविश्वास प्रस्तावमा भावी प्रधानमन्त्रीका रुपमा तपाईंको नाम उल्लेख थियो नि ?
मेरो जोड सहमति गर्ने तिर जोड हुन्छ । राष्ट्रिय सहमतिबाट अघि नगइकन देशले स्थिरता र प्रगति नपाउने देखिइसक्यो। त्यसकारण मैले प्रधानमन्त्रीमा दाबी गर्दिनँ । सबै राजनीतिक दलको सहमतिबाट जे हुन्छ,त्यही हुन्छ । नेपाली कांग्रेस र अन्य दलसँग भर्खर कुरा भएको छ । बुधबार राजनीतिक दलहरुसँग कुरा गरेर जसरी जनताको हित हुन्छ,सहमति बन्छ । त्यसरी नै हामी अघि बढ्छौं ।
नेपाली कांग्रेस तेस्रो स्थानको दलका रुपमा छ । कांग्रेसलाई दिने भए आफ्नै अध्यक्षलाई किन हटाउन खोजेको त ?
त्यसो पनि हामीले कहिं भनेका छैनौं । पार्टी आधिकारिताको दाबी गरिराखेका पनि छौं । सहमतिबाट जाऔं भनि पनि राखेका छौं। पार्टी विभाजन त ‘केपी जी’ ले गर्नुभयो नि। विघटनकारी काम उहाँले गर्नुभयो। हामी त्यसको लागि दोषी होइन नि । देशमा शान्ति,स्थिरता र विकासको वातावरण बनोस् भन्ने चाहेर जनतामा थियौं । आज जनताको जित भएको छ । जनतालाई बधाई दिन चाहन्छु ।शुभकामना भन्न चाहन्छु। जति शक्तिहरु असंवैधानिक छ भनि सडकमा जाने आन्दोलनकारी,नागरिक आन्दोलनकर्मी,पत्रकार जगत बुद्धिजीवी, संविधानविद, कानुनविद्, मजदुर, किसान आम जनताप्रति हार्दिक बधाई भन्न चाहन्छु ।
भावी राजनीतिका लागि राष्ट्रिय सहमतिमा जोड दिनुभएको छ । केपी ओलीलाई बाहेक गरी राष्ट्रिय सहमति खोज्ने कि उनलाई पनि सँगै लाने सम्भावना छ ?
केपी शर्मा ओली कसरी आउनुहुन्छ । हेर्नुपर्ने हुन्छ। पार्टी एकता अहिले हुन सक्दैन। उहाँले विभाजन गरिनै सक्नुभएको छ । प्रतिगमनतिर कदम चालि नै सक्नुभएको छ । एउटै पार्टी हुने सम्भावना म देख्दिन । तर, एउटा पार्टीको रुपमा केपीसँग कुरा हुनै नसक्ने भन्ने हुँदैन । उहाँको पनि एउटा पार्टी हुन्छ । ओलीसँग संवादै नगर्ने भन्ने संकिर्णता र यान्त्रिकता हामीमा हुँदैन। संवाद नै नहुने भन्ने मेरो दिमागमा छैन। ओलीसँग मिलेर सरकार बनाउने सम्भावना मैले देखिँदैन ।
त्यसो भए तपाईको लागि ओली भन्दा देउवा नजिक भए त ?
यो प्रश्न गलत राख्नुभयो । नजिक र टाढा इस्युले गर्छ । संविधानले संसद भंग गरेर घात गरेकाले र कांग्रेसले प्रधानमन्त्रीको कार्यलाई असंवैधानिक भनेकाले इस्युमा हामी सहमत भयौं नि । सहमति र असहमति इस्युका आधारमा हुने हो । यो पार्टी र त्यो पार्टी भन्ने होइन । ओलीले प्रतिक्रान्तिकारी कदम चाले। घात नेपाली जनता माथि गरेकाले त्यसमा असहमति हो नि हाम्रो ।
फेरि पनि केपी ओलीलाई प्रधानमन्त्री स्विकारेर जान सकिने अवस्था छैन नि ?
छैन छैन । त्यो सम्भावना उहाँले नै सिद्धाइदिनुभयो ।
तेस्रो पार्टी कांग्रेसलाई सरकारको नेतृत्व दिनु त गलत राजनीतिक संस्कार हुँदैन ?
हामी राजनीतिक दलसँग कुरा गर्दैछौं भन्दै छु त । सबै राजनीतिक दलसँग बसेर सहमति र समझदारी बनाउन हामी तयार छौं। पटक पटक मैले जनताको अघि भनेको छु। प्रधानमन्त्री हाम्रो प्राथमिकता होइन । हामीलाई नै प्रधानमन्त्री चाहियो भन्ने छैन। त्यही रुपमा बुझ्न म अनुरोध गर्दछु ।
तेस्रो दलको सभापतिलाई प्रधानमन्त्री बनाउने हानथाप भन्दा चुनावतिर लाग्नुहुन्छ कि ?
पार्टीहरुसँग छलफल गरेपछि नै त्यस विषयमा निष्कर्षमा पुग्छौं ।
सरकारमा हानथाप गर्नुभन्दा चुनावमा जाऔं न त भन्ने निर्णय पनि हुनसक्ला ?
हुनसक्छ । हुनसक्छ । राजनीतिक दलमा सहमति भएर त्यो पनि हुनसक्छ । त्यसमा अहिले हाम्रो कुनै निर्णय छैन । असंवैधानिक र अलोकतान्त्रिक कदमका विरुद्ध आवाज उठाउने दलसँग समझदारी बनाएर जान चाहन्छौं ।
सर्वोच्चको आदेशपछि कांग्रेस सभापतिसँग कुराकानी भयो ?
भयो ।
देउवाको प्रतिक्रिया के थियो ?
अरु कुरा केही गरिएन बधाई साटासाट ग¥यौं। भोलि काठमाडौंमा भेट्ने भन्ने कुरा भएको छ ।
तपाईकै पार्टीबाट प्रधानमन्त्री बन्ने अवस्था आए तपाई बन्ने कि माधवकुमार नेपाल ?
अहिलेको यो प्रश्न नै होइन । सबैसँग छलफल गर्दछौं भनेपछि यो प्रश्नमा जान आवश्यकै छैन ।
राष्ट्रपति हटाउन तिर लाग्नुहुन्छ कि हुन्न ?
हामी लाग्दैनौं। त्यतातिर हामीले सोचेंकै छैनौं । राष्ट्रपतिलाई व्ल्याकमेल केपी ओलीले गर्नुभएको हो। हामीले कहिले त्यसो गरेका छैनौं ।