छिनछिन खबर
राप्तीसोनारी, चैत २२–
बाँकेको राप्तीसोनारी गाँउपालिकाले कोरोना भाइरस (कोभिड –१९) को संक्रमणको जोखिमलाई मध्यनजर गर्दै सरकारले गरेको लकडाउनपछि प्रभावित बनेका गाँउपालिकाबासीलाई राहत वितरण गर्ने भएको छ । गाँउपालिकाले अति विपन्न, असाहय र मजदुरीवर्गका नागरिकलाई राहत वितरण गर्ने भएको हो ।
गाँउपालिका प्रमुख प्रशासकीय अधिकृत दल बहादुर बस्नेतले गाँउपालिकाले कोरोना भाइरस (काभिड– १९) रोकथामका लागि जारी लकडाउनबाट प्रभावित विपन्न समुदायलाई एकद्धार प्रणालीबाट राहत वितरण गरिने बताएका छन् । राहत वितरणका लागि गाउँपालिकाले तथ्याङ्क संकलनमा कुनै पनि विभेदरहित तरिकाले संकलन गर्न निर्देशन दिएको छ । गाउँपालिकाका प्रमुख प्रशासकीय अधिकृत बस्नेतले सरकारले एकद्धार प्रणालीमार्फत् राहत वितरण गर्ने नीति लिए बमोजिम गाँउपालिकाबाट राहत संकलन तथा वितरण गरिने बताए । गाँउपालिकामा रहेका वडागत तहमा तथ्याङ्क संकलन भइरहेको जानकारी दिँदै छिटै राहत वितरण गरिने उनले बताए । कसैलाई भेदभाव नगरी साँच्चिकै राहत पाउनु पर्ने व्यक्ति कुनैपनि अवस्थामा नछुट्ने बस्नेतले बताए । राहत वितरणमा भेदभाव हुँदैन र वितरणका क्रममा खटिने कर्मचारीले भेदभावपूर्ण तरिकाले राहत वितरण गरे कारवाहीसमेत हुने बस्नेतले जानकारी दिए ।
गाँउपालिकाले एकद्धार प्रणालीबाट राहत वितरण गरिने भएकाले यस्तो विपतको समयमा आफुखुसी राहत संकलन तथा वितरण नगरी एकद्धार प्रणालीमा आउन प्रमुख प्रशासकीय अधिकृत बस्नेतले सबैमा आग्रहसमेत गरेका छन । गाउँपालिकामा तयार पारेको तथ्याङ्क संकलन फारम हरेक वडामा कार्यालयमा पठाई सकिएको र त्यसको तथ्याङ्क संकलनको जिम्मा वडालाई हुने बताइएको छ । वडाबाट आएका तथ्याङ्कका आधारमा गाउँपालिकाले राहत वितरणको मापदण्डका आधारमा मात्रै राहत वितरण गरिने बस्नेतले बताए । आमदानीको कुनै स्थायी श्रोत नभएका, दैनिक जीवन गुजारा गर्न धौधौ पर्ने सम्बन्धित वडाले अति विपन्न हो भनेर प्रमाणित गरेका व्यक्ति र परिवारलाई अतिविपन्न मानि राहत वितरण गरिने बस्नेतले जानकारी दिए ।
राहत सामग्रीमा २५ केजी चामल, २ केजी दाल, १ लिटर तेल, २ केजी नुन र २ वटा लाईफव्याय साबुनलगायतका सामग्री रहेको उनले बताए । दैनिक ज्यालादारी र मजदुरी गरेर छाक टार्ने वर्गका परिवारलाई खाना र खाजा खानकै लागि समस्या पर्ने भएकाले समस्यामा परेकालाई राहत दिने सरकारले निर्णय गरेको छ । दैनिक ज्याला मजदुरीमा काम गर्ने परिवारलाई राहत वितरणमा जसअन्तर्गत २ जना भन्दा बढी परिवार भएका घर परिवारलाई प्रति परिवार २५ केजी चामल, २ केजी दाल, १ लिटर तेल, २ केजी नुन र २ वटा लाईफव्याय साबुनलगायतका सामग्री दिइनेछ भने २ जनाको परिवार भएका घर परिवारलाई प्रति परिवार त्यसको आधा राहत वितरण गरिने प्रमुख प्रशासकीय अधिकृत दल बहादुर बस्नेतले बताए । गाउँपालिले छिटो भन्दा छिटो तथ्याङ्क संकलन गरी अति आवश्यक राहत सहयोग प्रदान गर्न गाउँपालिकाले कोष समेत स्थापना गरेको प्रमुख प्रशासकीय अधिकृत बस्नेतले बताए ।
