छिनछिन खबर
काठमाडौं– भुक्तानी रोकिएको भन्दै निर्माण कार्य ठप्प भएको गौतमबुद्ध अन्तर्राष्ट्रिय विमानस्थल आयोजनालाई अर्थ मन्त्रालयले थप ७० करोड रुपैयाँ निकासा दिएको छ । अर्थ मन्त्रालयले सोधान्तरण गरी ७० करोड रुपैयाँ बजेट व्यवस्था गरिदिएको संस्कृति पर्यटन तथा नागरिक उड्डयन मन्त्रालयका प्रवक्ता घनश्याम उपाध्यायले जानकारी दिए ।
विमानस्थल बनाउने जिम्मा पाएको चिनियाँ कम्पनी नर्थवेस्टसिभिल एभिएसन कन्सट्रक्सनले पछिल्लो समय बिल पेस गरेको लामो समयसम्म भुक्तानी नपाएको भन्दै धावनमार्ग कालोपत्रे, पेरिमिटर र ट्याक्सी वे कालोपत्रेको काम ठप्प पारेको थियो । आयोजनाका लागि यो वर्ष खर्च गर्न पाउनेगरी ५९ करोडमात्र बजेट विनियोजन भएको थियो ।
आयोजनाको धावनमार्ग, एप्रोन, टर्मिनल, ट्याक्सी वे निर्माण गर्ने कामका लागि बजेट ५९ करोडमात्र थियो । सो भन्दा बढी खर्च भएपछि पर्यटन मन्त्रालयले थप बजेटका लागि अर्थ मन्त्रालयमा पत्र पठाएको थियो । विमानस्थल आयोजनाको इक्वुपमेन्ट राख्नका लागि ओपेक फण्डले १ अर्ब ७ करोड सहायता दिएको छ । यसबाट यो वर्षका लागि ७० करोड रुपैयाँ विनियोजन गरिएको थियो । असार १५ सम्म निर्माण गरिसक्ने लक्ष्य पाएको उक्त ठेकेदार कम्पनीले समयमै भुक्तानी नपाउँदा काम रोकिएको र भुक्तानी आउने निश्चित हुनेवित्तिकै काम सुरु हुने आयोजना कार्यालयले जनाएको छ ।
ठेकेदार कम्पनीले कामदारलाई समेत दिने ज्याला नपाएपछि काम रोक्न बाध्य भएको बताएको छ । धावनमार्ग, ट्याक्सवी वे, स्ट्रिप वे, पेरिमिटर, टर्मिनल, टावरजस्ता काम असार १५ मै सक्ने र आउने मंसिरदेखि व्यावसायिक उडान गर्ने सरकारी घोषणा रहेको छ । धावनमार्ग र ट्याक्सी वे कालोपत्रेको काम १० दिनजतिमा सकिने अनुमान गरिएको छ ।