नेपालगन्ज- बाँके प्रतिनिधि सभा क्षेत्र नम्बर २ का सदस्य मोहम्मद ईस्तियाक राईले नेपालगन्ज क्षेत्रको समग्र विकासका लागी सबैसँग सहकार्य गरिने बताएका छन् । निर्वाचित भएपछि आफ्नो धारणा सार्वजनिक गर्न सोमबार नेपालगन्जमा आयोजित पत्रकार सम्मेलनमा बोल्दै उनले भने, ‘मसँग ठुलो अपेक्षा गरी क्षेत्र नम्बर २ का बासिन्दाले अमुल्य मत दिएर जिताउनु भएको छ, विकास गर्नका लागी मैले जनताको प्रतिनिधित्व गरेको हुँ, त्यसकारण अबको पाँच वर्षमा मिलेर काम गर्नुपर्छ ।’
चुनावमा कसैको पनि जय–पराजय नभएको बताउँदै आफुसँग प्रतिस्पर्धामा आएका उम्मेदवारसँग पनि सहकार्य र समन्वय गर्ने प्रतिवद्धता जनाए । ‘मलाई यसक्षेत्रका हिन्दु, मुस्लिम, सिख र ईसाई धर्मका दाजुभाई दिदि बहिनीले अमुल्य मत दिएर जिताउनु भयो, त्यसकारण मैले अब धर्म र जातभन्दा माथी उठेर जनताको साझा प्रतिनिधिको हैसियतले विकासको नेतृत्व गर्छु,’ पुर्वमन्त्री राईले भने । आफुलाई धर्म र जातसँग जोडेर नहेर्न उनले पटक–पटक अनुरोध गरेका थिए ।
नेपालगन्जलाई प्रादेशिक राजधानी बनाउन, यहाँको सडक, ढल समस्या समाधान गर्न तथा संविधान संशोधन गरी असमानताको अन्त्य गर्न विशेष पहल गर्ने उनको भनाई छ । यसका साथै नेपालगन्जमा पर्यटन प्रर्वद्धन गर्न, महत्वपुर्ण धार्मिक स्थल बागेश्वरी मन्दिर तथा मस्जिद, गुरुद्धारा तथा चर्चको संरक्षणमा पनि ठोस पहल गर्ने प्रतिनिधि सभा सदस्य राईले बताए । आफ्नो पार्टी सरकारमा गएपनि/नगएपनि क्षेत्र नम्बर २ को विकासका लागी आफु डटेर लाग्ने प्रतिवद्धता जनाए । हालै सम्पन्न प्रतिनिधि सभा निर्वाचनमा वाम गठबन्धनबाट उम्मेदवार बनेका पशुपति दयाल मिश्रलाई पराजित गरी राई निर्वाचित भएका हुन् । यसअघि २०६४ सालमा संविधान सभा सदस्यमा निर्वाचित भएका राई श्रम तथा यातायात मन्त्री समेत भएका थिए ।