काठमाडौं, कात्तिक २४-
भारत सरकारले उसको हजार र पाँच सय दरका नोटमा लगाएको प्रतिबन्धबाट नेपाललाई परेको समस्या समाधानका लागि नेपाल राष्ट्र बैंकले भारतीय रिजर्व बैंकसँग समन्वय गरिरहेको जनाएको छ । प्रतिबन्धपछि नेपालमा रहेका भारतीय नोटहरु के गर्ने भन्नेबारे भारतीय रिजर्व बैंकका डेपुटी गर्भनर आर गान्धीसँग बुधबार आफैले फोनमा कुराकानी गरेको राष्ट्र बैंकका डेपुटी गभर्नर चिन्तामणि शिवाकोटीले बताए ।
‘भारतीय रिजर्व बैंकका डेपुटी गभर्नरले नेपालमा के कती त्यस्ता नोट छन् भन्ने चासो राख्नु भयो, यो भारत सरकारको निर्णय भएकोले रिजर्व बैंक एक्लैले मात्र समस्या समाधान गर्न नसक्ला,’ उनले भने । राष्ट्र बैंकसँग पनि भारतीय नोट केकती परिमाणमा छ भन्ने यकिन तथ्यांक नभएको उनले बताए । २५ हजार रुपैयाँसम्म भारतीय नोट नेपालमा बोक्न पाउने व्यवस्था भएका कारण नेपालमा पनि भारतीय मुद्रा भएको र नागरिकसँग भएका ती नोटहरु के गर्ने भन्ने विषयमा हाल छलफल जारी रहेको उनले बताए ।