काठमाडौं– कोरोना भाइरसविरुद्धको खोप जेठ २५ गतेबाट लगाइने भएको छ। चीनले अनुदान दिएको १० लाख डोज खोप जेठ २५ गतेबाट लगाउन सुरू गर्ने निर्णय गरिएको हो ।
स्वास्थ्य मन्त्रालयमा मंगलबार भएको छलफलले २५ गतेबाट खोप लगाउने निर्णय गरेको स्वास्थ्य सेवा विभागअन्तर्गत खोप शाखाका प्रमुख डाक्टर झलक गौतमले जानकारी दिएका छन् ।
देशभर ६० देखि ६४ वर्ष उमेर समूहका मानिस झन्डै साढे ८ लाख रहेकाले छलफलपछि बैठकले चीनबाट अनुदानमा आउने खोप यो समूहलाई लक्षित गरेर खोप दिने निर्णय भएको हो । हिमाली जिल्लाहरूको हकमा भने १८ वर्ष उमेर माथिकालाई पनि खोप दिन सकिने डा. गौतम बताउँछन्। तर त्यसका लागि सुरुमा खोपको उपलब्धता हेरिने र पुग्ने अवस्था आयो भने मात्र लगाइने उनले जनाएका छन् ।
खोप देशव्यापी रूपमै लगाउने भएकाले चाँडै खोपहरू सम्बन्धित जिल्लामा पठाउने काम सुरू गर्ने खोप शाखाको तयारी छ।
फाइल तस्बिर ।
